دم الشهيد دمي

دم الشهيد دمي

موتني لو عايز

صدري أهو مكشوف ..

لا ف إيدي أي سلاح

ولا بأرمي بالملوتوف ..

ثابت أهو مكاني

و انت مليك الخوف ..

ماسك دروع في إديك

و أنا روحي على كفي ..

بهتف مع الملايين

إيدي في إيد صاحبي ..

فاكرني هأجري و أخاف

جايلك لابس كفني ..

خلاص ماهي بانت

و وشوشكم انكشفت ..

بتمثلوا على مين

ده رواية و اتفقست ..

بتقول بتحميني

بتحابي على عرضي ..

ييجي علينا الليل

تضربني من ضهري ..

دمي ماهوش غالي

دم الشهيد أغلى ..

اضربني من تاني

حاول تخوفنا ..

إحنا خلاص فوقنا

و عنينا فوق راسنا ..

ما رضينا يوم بالذل

والحلم حركنا ..

اجمع في رجالتك

ارفع في وشي سلاح ..

إيدك ماليها الدم

بتساعد السفاح ..

شايف ف ده هبتك

وظهرت بحقيقتك ..

فكرتنا نمنا

رديتلنا الإحساس ..

لساك بتضربني

لساك بتقتلني ..

طب قوللي بعت بكام

لو هان عليك عرضي ..

كلمة هقولهالك

دم الشهيد دمي ..

مهاب التليتي